ព័ត៌មាននិងព្រឹត្តិការណ៍លម្អិត

កាលពីរសៀលថ្ងៃទី០៥ ខែមីនា ឆ្នាំ២០២៤ លោក អាត់ ធន់ ប្រធានសហភាពការងារកម្ពុជា បានអញ្ជើញចុះជួបថ្នាក់ដឹកនាំ និងសមាជិកសហជីពមូលដ្ឋាន ដែលជាសមាជិករបស់សហព័ន្ធសហជីពកម្មករវិស័យដឹកជញ្ជូនកម្ពុជា (CTWF) ក្រោមឆត្ររបស់សហភាពការងារកម្ពុជា នៅអាកាសយានដ្ឋានភ្នំពេញអន្តរជាតិ ។

នៅក្នុងពិធីជួបជុំនេះ លោក អាត់ ធន់ បានចែករំលែកព័ត៌មានខ្លះៗរបស់សហភាពការងារកម្ពុជា ដូចជាកិច្ចការងារសំខាន់ ៣ យ៉ាងរបស់ CLC គឺការបណ្ដុះបណ្ដាល ការចងក្រង និងការដោះស្រាយវិវាទ។ បន្ថែមពីនេះ លោកក៏បានលើកឡើងពីការសហការរបស់ CLC ជាមួយនឹងដៃគូពាក់ព័ន្ធផ្សេងទៀតទាំងថ្នាក់ជាតិ តំបន់ និងអន្តរជាតិ ដើម្បីលើកកម្ពស់សិទ្ធកម្មករ និងលក្ខខណ្ឌការងារល្អប្រសើរ។

ក្រៅពីនេះ ដើម្បីឆ្លើយតបនឹងការស្នើសុំឱ្យលោកជួយពន្យល់អំពី របបសន្ដិខសុខសង្គម លោកក៏បង្ហាញអំពីរបបគ្រោះថ្នាក់ការងារ របបថែទាំសុខភាព របបប្រាក់សោធន និងរបបនិកម្មភាព ដែលផ្តោតលើលក្ខខណ្ឌ និងអត្ថប្រយោជន៍នៃរបបទាំងអស់នេះ។

ម្យ៉ាងវិញទៀត លោកក៏បានផ្ដល់ជាមធ្យោបាយ ឬនីតិវិធីខ្លះៗ ដើម្បីឆ្លើយតបទៅនឹងការបំពានលើលក្ខខណ្ឌការ និងការប្រើប្រាស់បណ្ណ ប.ស.ស.។