ព័ត៌មាននិងព្រឹត្តិការណ៍លម្អិត

កាលពីថ្ងៃទី០៩ ខែកញ្ញា ឆ្នាំ២០២៤ លោក គង់ អាទិត្យ ប្រធានសហភាពការងារកម្ពុជា បានអញ្ជើញចូលរួម និងមានមតិសំណេះសំណាលជាមួយនឹងសិក្ខាកាមចំនួន ៤៥ នាក់នៅក្នុងវគ្គសិក្សាស្ដីពី «សិទ្ធិសេរីភាពនៃការបញ្ចេញមតិ និងការនិយាយស្ដីប្រកបដោយសុវត្ថិភាព» និង «ការតស៊ូមតិផ្នែកសិទ្ធិមនុស្សប្រកបដោយឥទ្ធិពល និងការត្រៀមរៀបចំធ្វើការបញ្ចុះបញ្ចូលប្រកបដោយជោគជ័យ» នៅអង្គការមជ្ឈមណ្ឌលអប់រំច្បាប់សម្រាប់សហគមន៍ (CLEC) រាជធានីភ្នំពេញ។

កម្មវិធីនេះ ត្រូវបានរៀបចំឡើងក្នុងគោលបំណង ពង្រឹងសមត្ថភាពរបស់មេដឹកនាំសហជីពអំពីសេរីភាពនៃការនិយាយស្ដីដោយផ្អែកលើច្បាប់អន្តរជាតិ និងរដ្ឋធម្មនុញ្ញនៃព្រះរាជាណាចក្រកម្ពុជា ចរិតលក្ខណៈនៃបទញុះញង់ និងបរិហាកេរ្តិ៍ក្នុងប្រទេសកម្ពុជាសព្វថ្ងៃ និងវិធីសាស្ត្រស្របច្បាប់ជាក់ស្ដែងដើម្បីបង្ការកុំឱ្យកើតមាន។

វគ្គសិក្សានេះដែរ មានរយៈពេល ០២ ថ្ងៃចាប់ពីថ្ងៃទី០៩ ដល់ថ្ងៃទី១០ ខែកញ្ញា ឆ្នាំ២០២៤ ហើយត្រូវបានរៀបចំដោយ អង្គការសម្ព័ន្ធភាពការពារសិទ្ធិមនុស្សកម្ពុជា (CHRAC) ដោយសហការជាមួយ សហភាពការងារកម្ពុជា (CLC) សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU ស៊ីខៅឌូ) សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) អង្គការតម្លាភាពកម្ពុជា(TIC Cambodia) ក្រោមជំនួយថវិការបស់សហភាពអឺរ៉ុបតាមរយៈសកម្មភាពគម្រោង BELIEVE។