ព័ត៌មាននិងព្រឹត្តិការណ៍លម្អិត

លោក អាត់ ធន់ ប្រធានសហភាពការងារកម្ពុជា (CLC) លើកឡើងថា តាមរយៈកិច្ចពិភាក្សាត្រីភាគី កាលពីព្រឹកថ្ងៃទី១៨នេះ ខាងភាគីនិយោជកដំឡើងប្រាក់ឈ្នូលបន្ថែមចំនួន១,៥០ដុល្លារ (២០១,៥០ដុល្លារ) ចំណែកឯខាងភាគីរាជរដ្ឋាភិបាលដំឡើងឱ្យត្រឹម២ដុល្លារ (២០២ដុល្លារ) ខណៈពេលខាងភាគីសហជីពឯករាជ្យ បន្ថយមកស្នើត្រឹម១៣ដុល្លារ (២១៣ដុល្លារ) និងសហជីពផ្សេងទៀតស្នើដំឡើងត្រឹម៤ដុល្លារ (២០៤ដុល្លារ)។

លោកបញ្ជាក់ថា៖ «សហជីពដាក់ការជជែកគ្នាទៅ ក្រោយនិយោជកដំឡើង​អ៊ីចឹងង យើងបញ្ចុះ​មកត្រឹម​ប៉ុណ្នឹង​(២១៣ដុល្លារ)។ ប៉ុន្តែនៅពេលដែលចរចាថ្ងៃទី២៨ ប្រហែលមិនមានការចុះទៀតទេ ហើយបើគេមិន​សម្រេច ត្រូវធ្វើការបោះឆ្នោត»។

លោកបន្ថែមថា បន្ទាប់ពីកិច្ចប្រជុំចប់នេះ ខាងសហជីពបន្តពិភាក្សាផ្ទៃក្នុង ដើម្បីរកដំណោះស្រាយ និង​យន្តការដែលអាចដំឡើងប្រាក់ឈ្នួលឱ្យកម្មករច្រើនជាងនេះ។  លោក អាត់ ធន់ បន្តថា នឹងផ្តល់ជាសារ និងទុក្ខកង្វល់នានារបស់កម្មករ តាមរយៈបណ្តាញសង្គម ដើម្បីឱ្យរដ្ឋាភិបាល និងភាគីផ្សេងៗ មានការ​កែ​ប្រែគំនិត និងផ្តល់ប្រាក់ឈ្នួលប្រសើរជាងនេះ។ តែបើគ្មានជម្រើសអ្វីផ្សេងទេ លោកថា គឺអាស្រ័យលើការ​បោះឆ្នោត​ចុងក្រោយ ក្នុងចំណោមជាង៥១រូប គ្រប់ភាគីទាំងអស់ដែលលទ្ធផលបែបណា គឺមានតែតាម​ហ្នឹង។

លោកលើកឡើងថា៖ «យើងស្នើឱ្យខាងកម្មករបន្តធ្វើការជំរុញ តាមរយៈការធ្វើយុទ្ធនាការអីផ្សេងៗ ដើម្បី​ឱ្យ​មាន​ឥទ្ធិពលលើនិយោជក និងរដ្ឋាភិបាល ក្នុងការដំឡើងប្រាក់ឈ្នួលបន្ថែមទៀត»។

ប្រភព៖ https://khmer.cambojanews.com/the-meeting-on-garment-workers-minimum-wage-still-disagree-each-other-with-final-meeting-will-hold-on-sept-28/?fbclid=IwAR1tvgN73i1aO1DCMmCmys-hcSM232Hnyj21Hk5ADSNfkTurWsZfFx8zhFI